رحلة إلى الأسكندرية
عُدت الثالثة صباحا إلى المنزل أُمنى نفسى بكوب شاى أخضر بالنعناع أتناوله بعد دش ساخن و بمجرد دخولى الشقة ، وجدتها تجلس
بجوار الأباجورة المضيئة . قلتلها :
- مالك حبيبتى .
- عايزة أروح أسكندرية
- أمتى يا بيبى
- ردت الرد الذى صدمنى و قالت دلوقت .
- بيبى عايزة نروح أسكندرية دلوقت و أنا لسة راجع من الشغل طول اليوم مجهد ممكن نخليها بكرة ؟ قلت لها هذا و أنا أضحك من أثر الصدمة
- لا دلوقت . كنت لا أستطيع رفض طلب لها فهى كل حياتى .
- طيب حبيبى ممكن نتناقش بالمنطق .
- أوكيه بس أعمل حسابك مش حتقدر تغلبنى .
- أنا أغلبك هاه هاه هاه مين يقدر على عزيزة .
- عزيزة مين ؟
- و لا حاجة ده أسم فيلم , أوكيه حبيبتى . حضرتك عايزة تروحى أسكندرية ليه ؟
- عشان اعوم فى البحر .
- طيب حبيبى ما عندنا النادى . ولسه حضرتك جايبة بكينى يهوس ,و كمان عندك المايوه الشرعى بتاعك ثم أردفت قائلاً وأنا بأضحك و مش عارف ده شرعى ازاى .
- لا البحر غير البسين .
- إحنا دلوقت فى أواخر الشتا يعنى الجو حيكون لسه برد .
- علشان كده حأستخدم المايوه الشرعى يا عبقرى زمانك .
- ممكن بكرة أكون أستريحت .
- لا أنا عايزة أروح دلوقت عشان نوصل قبل الشروق و أنزل البحر قبل الناس ما تقوم علشان ما حدش يبص على جسمى و نظرت لى مباشرة ورفعت إحدى حاجبيها و نزلت الأخر و قالت :
- وألا عايزنى أكون فرجة ؟
- لا لا سمح الله .
- طيب ممكن ساندوتش جبنة و كوباية شاى ؟
- فأخرجت أشياء كانت تضعها جوارها وقالتلى :
- عشان عارفاك مدمن أيرول جراى أخضر بالنعناع , وكمان البرجموت , جهزت 2 ترموس , كل ترموس فيه نوع ومجهزالك الميه المتلجة يا عم المزجانجى .
- طيب .
- أما بالنسبة للساندوتش حأعزمك فى الماستر و الأمر لله .
- ده أنتى مخططة من بدرى .
- من زفااااااااااااااااااان .و ضحكت فهى تعلم عشقى لتلك الكلمة التى هى من مسرحية إلا خمسة .
- طيب ممكن أخد دش .
- مسيو حمدلله ع السلامة نورت الإسكندرية ثم وجه كلامه لها :
- هانم نورتى كل إسكندرية والساحل الشمالى كله . إتفضلى و ذهبنا إلى مائدتى المفضلة التى تجعلنى كما لو كنت فى داخل البحر و طلبنا الأكل و بعد الإنتهاء و أحضار الشاى لنا ، رأيت صديقة كنا على علاقة من عشرسنوات بالنادى و أنهيت العلاقة من طرفى لأسباب خاصة و قد حاولت الأتصال بى فترة طويلة ولما لم تجد إستجابة فضلت الأبتعاد فوجئت بها تقترب منا و خشيت ما ستفعله أمامها . و قالت لى :
- إزيك يا حبيبى و ألا أنت مش حبيبى .
- كنا حبايب قلت لها هذا و انا مبتسم .
- كانت "حبيبتى" تنظر لى و هى تضغط على أسنانها و قد لمعت عيناها . وجدت سميحة وهى صديقة النادى تنظر لها و تقل لى :
- مش تعرفنا فقدمتهم لبعض , فإذا ب"سميحة" تقل لى :
- أنا عارفة إنك ما غيرتش موبيلك .
- إنتى متتبعانى و إلا إيه ؟ قلت لها و أنا أبتسم .
- أكيد يا حبيبى إنت اللى قطعت العلاقة بينا لو سمحت ترد لما أكلمك المرة دى ده بعد إذن الهانم طبعا . فقالت لها كما لو كان الأمر لا يعنيها ونظرت لى قائلة :
- أكيد أبقى رد . ثم أضافت كلمة جعلت وجهى يكاد ينفجر من الأحمرار فقد قالت إبقى رد على الحاجة .
- وعرفتى منين إنى حاجة ؟
- علشان اللى فى سنك لازم يكونوا حجوا عشان قريب حيقابلوا رب كريم . قالت هذا و هنا لم أتمالك نفسى من الأنفجار ضاحكا و لكننى أخفيت ضحكاتى خلف مناديلى الورقية التى جعلتنى أبدو كما لو كانت اصابتنى شرقة شديدة . و بعد إنصراف سميحة حاولت تمالك نفسى وقلت لها :
- اللى أنتى عملتيه رهيب .
- واحدة شايفانى قاعدة معاك , يعنى ممكن تعمل مصيبة بكلامها ده فكان لازم ارد عليها و بعدين من الواضح إن العلاقة بينكم كانت قوية جدا .
- لا كانت ضعيفة جدا . قلتلها و أنا أبتسم و أضيق عيناى و انا أنظر لها .
- لا يا بيبى بس أفتكرت مامتك إنتى عاملة زيها بالظبط و الموقف إتكرر معاها .
كانت هى أبنتى ذات التسع سنوات والتى كانت نسخة طبق الأصل من معشوقتى الأولى والأخيرة زوجتى الراحلة "ماهيتاب" و التى أقسمت برغم الرغبات المشتعلة فى جسدى ألا أحضر زوجة أب لحبيتى الصغيرة "ماهيتاب" .
تحياتى لكم أصدقائى و إلى لقاء قريب. . .
محمد أحمد خضر
+2 0122 312 8543
+2 0101 456 1217
+2 0114 955 5927
makarther90@yahoo.com
ليست هناك تعليقات:
إرسال تعليق